नाशिक : ‘समाजोपयोगी उपक्रम राबवणाऱ्या रोटरीचे कार्य विश्वव्यापी होत असून, त्यासाठी अधिकाधिक सदस्य नोंदणी करणे ही बाब क्रमप्राप्त आहे. नाशिक जिल्ह्यात पाणी नियोजनावर रोटरीने आपले लक्ष केंद्रित केले असून, नाशिक जिल्ह्यातील १५ तालुक्यांना पाणीटंचाई बाराही महिने भासणार नाही, यासाठी रोटरी क्लब धडपडत आहे. दुष्काळमुक्त नाशिकसाठी रोटरीने ‘ब्ल्यू प्रिंट’ तयार केली आहे,’ असे प्रतिपादन नाशिक रोड रोटरी क्लबच्या अध्यक्षा डॉ. रोचना राय-शर्मा यांनी केले.
‘रोटरी क्लब ऑफ नाशिक रोड’ आयोजित वार्षिक आढावा बैठकीत त्या बोलत होत्या. नाशिक-पुणे महामार्गावरील हॉटेल क्वालिटी इन येथे झालेल्या कार्यक्रमात मंचावर डॉ. राजेंद्र भामरे, कैलास क्षत्रिय, डॉ. रोचना राय-शर्मा, डॉ. स्नेहल गांगुर्डे आदी मान्यवर उपस्थित होते.
रॉय यांनी रोटरीच्या कार्याची माहिती देताना विभागीय स्तरावर अनेक उपक्रमांची आखणी करण्यात आल्याचे नमूद केले. त्यात ग्रामीण भागात पाण्याचे नियोजन, पोलिओ निर्मूलन फंड उभारणी, प्रौढ साक्षरता व रक्तदान शिबिर या उपक्रमांचा समावेश आहे. रोटरी क्लबच्या सर्वच शाखांचे कार्य कौतुकास्पद असल्याचे सांगून, त्यांनी सर्व सदस्यांचे अभिनंदन केले. येत्या जानेवारी महिन्यात शिर्डी येथे होणाऱ्या रोटरीच्या आंतरराष्ट्रीय परिषदेबाबतही त्यांनी माहिती दिली.
आगामी उपक्रमात अपेक्षित ध्येय गाठण्यासाठी सर्वतोपरी प्रयत्नशील राहणार असल्याबाबत रोटरीच्या सर्व सभासदांनी आश्वस्त केले. सूत्रसंचालन अनिल काळे व सुनीता वर्मा यांनी केले. या प्रसंगी फिरदोस कपाडिया, सौमित्र दास, डॉ. ज्ञानेंद्रकुमार गुप्ता, बाळकृष्ण साहू, प्रवीण बिसोई, कुणाल शर्मा, धनंजय जोशी, महेश साळवे, अॅड. दिनेश शिंदे आदींसह रोटरीचे सदस्य मोठ्या संख्येने उपस्थित होते.
(सोबतचा व्हिडिओ पाहा.)